MISÈRIA
de Joan Bodon

Dins una cort plena de fems
un dròlle cargava lo carri…

Me soveni d’aquel ostal
tot fendasclat de fons a cima,
entre lo potz e la fenhal
oras pudentas de la trima…

Una femna negra, pelharda,
brandissiá qualque pairolet.
Una truèja maire, bocharda
de longa fasiá pissolet.

Clamor de l’Autan [per las planas…
espandiment dels castanhèrs…
Perqué sonavan las campanas ?
Per qual se quilhan los cloquièrs ?

Dins una cort plena de fems
un dròlle cargava lo carri…*

* Joan Bodon, Poèmas (Vilamatièr: IEO-Edicions-Ostal Joan Bodon, 2010), 23.